– 3 – 

Կնոջ մարմինը պատրաստված է թափանցիկ պլաստիկից և լուսավառվում է, երբ միացնում եք վարդակին: Կարող եք սեղմել կոճակը, ու տարբեր համակարգեր կլուսավորվեն: Անոթային համակարգը`սիրտն ու զարկերակները,  կարմիր են, երակները` մանուշակագույն: Լիմֆատիկ համակարգը դեղին է: Մարսողական համակարգը` կանաչ, լյարդն ու երիկամները` լազուր: Նյարդերը ներկված են նարնջագույն, իսկ ուղեղը վարդագույն է: Կմախքը, ինչպես կարող եք ենթադրել, սպիտակ է:

Վերարտադրողական համակարգը կամընտրական է և կարող է հեռացվել: Կարող է պարունակել մանրակերտ սաղմ: Ուստի ծնողական վերահսկողությունը խրախուսելի է: Մենք չենք ցանկանում վախեցնել կամ վիրավորել:

– 4 – 

Տղամարդն ասաց.
– Իմ տանը դրանից ոչ մի հատ չի լինելու: Ջահել աղջիկները սխալ պատկերացում են կազմում գեղեցկության, էլ չեմ ասում անատոմիայի մասին: Եթե իրական կինն այդպիսի կառուցվածք ունենար, դեմքի վրա ընկել էր:

Կինը ասաց.
– Եթե մենք արգելենք նրան խաղալ դրանցով, ինչպես մյուս աղջիկները, նա իրեն մեկուսացած կզգա: Հետո խնդիրներ կունենանք: Նա կերազի դրա մասին ու կերազի այդպիսին դառնալ: Բռնությունը ծնում է սուբլիմացիա: Ինձնից լավ գիտես:

Տղամարդն ասաց.
– Հարցը միայն ցցված պլաստմասե ծծերը չեն, բա հագո՞ւստը: Հագուստն ու տխմար տղա տիկնիկը, ի՞նչ էր դրա անունը` սոսնձված վարտիքովը:

Կինը ասաց.
-Ավելի լավ է հավեսը հանի, քանի դեռ փոքր է:

Տղամարդն ասաց.
-Լավ, բայց իմ աչքից հեռու:

Աղջիկը նետի պես աստիճաններն ի վար սուրաց: Երեխան մորեմերկ էր: Մազերը` կարճ կտրած, գլուխը հետուառաջ արած, ոտքի մատներից մի քանիսը բացակայում էին, ամբողջ մարմինը պատված էր գալարազարդ մանուշակագույն դաջվածքներով:  Նա բախվեց ծաղկամանի մեջ տնկած նազվարդին, մի պահ ցնցվեց անսուրբ հրեշտակի պես ու ընկավ:

Տղամարդն ասաց.
-Կարծում եմ` անհանգստանալու բան չունենք:

– 5 – 

Կնոջ մարմինը շատ կիրառություններ ունի: Այն օգտագործվել է որպես դռան թակիչ, որպես շշի բացիչ, որպես տկտկացող փորով ժամացույց, որպես լուսամփոփներ  բռնած մի բան, որպես ընկույզկոտրիչ, պարզապես իրար սեղմեք արույրե ոտքերն ու դուրս կթափվեն ձեր ընկույզիկները: Այն ջահակիր է, վեր է պարզում հաղթական ծաղկեպսակներ, աճեցնում է պղնձե թևեր ու օդ մեկնում նեոնե աստղերի օղակահյուսը. շենքեր են հենված դրա մարմարե գլուխներին:

Այն վաճառում է մեքենաներ, գարեջուր, սափրվելու լոսյոն, ծխախոտ, թունդ ալկոհոլ, այն վաճառում է սննդակարգի առաջարկներ ու ադամանդներ և երազանքներ փոքրիկ բյուրեղապակե շշերի մեջ:  Սա այն դե՞մքն է, որ հազարավոր ապրանքներ է բացահայտել աշխարհին: Հենց ինքն է, որ կա, բայց ուրիշ ոչինչ չմտածես, քաղցրիկս, այդպիսի ժպիտ ամեն երկրորդն ունի:

Այն սոսկ չի վաճառում, այն վաճառված է: Փողերը ներհոսում են այս կամ այն երկիր, ներթռչում են, բառացիրոեն սողոսկում են ներս,  մի լավ հագնված տղամարդ մյուսի ետևից, ում գայթակղել են այդ բոլոր անմազ մանկական ոտքերը: Լսի՛ր, դու ուզում ես, չէ՞, որ ազգային պարտքը նվազի: Հայրենասե՞ր չես: Ա՜յ, ոգի եմ ասել: Ա՜յ, աղջիկ եմ ասել:

Նա բնական պաշար է` բարեբախտաբար վերականգնվող, որովհետև այսպիսի բաները այնքան արագ են մաշվում: Հիմա էլ առաջվա պես չեն սարքում: Անորակ բաներ են:

– 6 – 

Մեկին գումարած մեկ անում է մի ուրիշ մեկ: Կնոջ համար հաճույքը պարտադիր պայման չէ: Զույգերի կապն ավելի ամուր է սագերի դեպքում: Մենք չենք խոսում սիրո մասին, մենք խոսում ենք կենսաբանության մասին: Աղջիկս, բոլորս էլ այդպես ենք այստեղ հասել:

Խխունջներն ուրիշ ձև են դա անում: Նրանք հերմաֆրոդիտ են ու գործին լծվում են երեքով:

– 7 – 

Յուրաքանչյուր կնոջ մարմին պարունակում է կնոջ ուղեղ: Հարմար է: Գործը առաջ է տանում: Քորոցներով ծակծկիր այն ու հրաշալի արդյունքի կհասնես: Հանրաճանաչ հին երգեր: Կարճ միացումներ: Վատ երազներ:

Ինչևէ, այս ուղեղներից յուրաքանչյուրն ունի երկու կես: Դրանք իրար միացված են հաստ լարով. նեյրոնային ուղիները մի տեղից մյուսն են թռչում, էլեկտրական տեղեկատվության բոցկլտոցները ետուառաջ են սորում: Լուսային ալիքների պես: Զրույցի պես: Որտեղի՞ց կինը գիտի այդ ամենը: Նա լսում է: Նա ականջ է դնում:

Հերթը հասավ տղամարդու ուղեղին, պատկերն այլ է: Ընդամենը բարակ մի կապ: Տարածությունն` այստեղ, ժամանակն` այնտեղ, երաժտությունն ու թվաբանությունը կողպված են իրենց դարակներում: Աջ կիսագունդը չգիտի` ինչ է անում ձախը: Չնայած նշան բռնելու ժամանակ ձգանը քաշելիս թիրախին զարկելու համար լավ է: Ո՞րն է թիրախը: Ո՞վ է թիրախը: Ո՞ւմ է պետք: Կարևորը դիպուկ հարվածելն է: Սա էլ ձեզ տղամարդու ուղեղը: Առարկայական:

Ահա, թե ինչու են տղամարդիկ այդքան տխուր, ինչու են իրենց այդքան միայնակ զգում, ինչու են իրենց համարում ափ նետված որբուկներ, առանց պարտականությունների ու պատասխանատվության, ունայնության անդունդում:

– Ի՞նչ ունայնություն , – հարցնում է կինը, – ի՞նչի մասին ես խոսում:
–  Տիեզերքի ունայնությունը, – պատասխանում է տղամարդը:
Ու կինը ասում է.
– Օ՜, – ու դուրս է նայում պատուհանից՝ փորձելով մտնել նրա դրության մեջ, բայց անօգուտ, չափից դուրս շատ բան է տեղի ունենում, տերևների խշխշոցը չափից դուրս բարձր է, չափից դուրս շատ ձայներ են հնչում, ուստի կինն ասում է.
– Կուզե՞ս պանրով սենդվիչ, մի կտոր տո՞րթ, թե՞յ:
Իսկ տղամարդը կրճտացնում է ատամները, որովհետև կինը չի հասկանում իրեն, ու  գնում է թափառելու ոչ թե պարզապես միայնակ, այլ Միայնակ` մոլորված խավարի մեծ, մոլորված իր գանգատուփի  մեջ` փնտրելով իր երկրորդ կեսին, իր երկվորյակին, ով կարող էր լրացնել նրան:

Հետո գլխի է ընկնում. նա կորցրել է Կնոջ մարմինը: Նայի՛ր, այն փայլփլում է մթության մեջ, հեռու առջևում, ամբողջության տեսիլք է, հասունության, ինչպես հսկա մի սեխ, ինչպես մի խնձոր, ինչպես սեքսի մասին վատ վեպի մեջ կուրծք ցույց տվող մի մետաֆոր, այն փայլում է փուչիկի պես, մառախլապատ կեսօրի նման, ջրակալած լուսնի, շողալով լույսի իր կճեպի մեջ:

Բռնիր նրան: Թաքցրու դդումի մեջ, բարձր աշտարակում, բնակարանային համալիրում, դահլիճում, տանը, սենյակում: Արագ, թոկը գցիր վիզը, կողպիր, շղթայիր, մի քիչ ցավ պատճառիր, որպեսզի այն երբեք այլևս չհեռանա քեզնից:

Անգլերենից թարգմանեցին Արմինե Դանիելյանը, Գոհար Ավագյանը