Արամ Սարոյան | ծնվ. 1943թ., ԱՄՆ

Ծնվել է  Նյու Յորքում: Հայրը Վիլյամ Սարոյանն է, մայրը` դերասանուհի Քերոլ Գրեյսը, ով հրեական ծագում ուներ: Քույրը դերասանուհի Լյուսի Սարոյանն է:

1960-ականների ամերիկյան ավանգարդ բանաստեղծության հայտնի դեմքերից է, հարել է բիթ ուղղությանը: 

Արամ Սարոյանի չորքոտանի ”m”-ն Գինեսի ռեկորդների գրքում գրանցված է որպես աշխարհի ամենակարճ բանաստեղծություն: Բոբ Գրամընը գրեց, որ դա «Ես եմ» (”I am”)-ի բառախաղ է` ինքնագիտակցության ձևավորում: Սարոյանի` սպիտակ էջի կենտրոնում գրված «Լույս» (”lighght”) բանաստեղծությունը (1965թ.) հայտնվեց Ամերիկյան գրականության անթոլոգիայում (խմբագիր` Ջորջ Փլիմպթըն) և մյուս բոլոր հեղինակներին հավասար 500$ հոնորար ստացավ` շահելով Արվեստի Ազգային Ֆոնդի մրցանակն ու շատերի հակակրանքը` թե` մի բառը դեռևս բանաստեղծություն լինելուց շատ հեռու է: 25 տարի անց էլ Ռոնալդ Ռեյգանը չէր դադարում կծու ակնարկներ նետել ”lighght”-ի հասցեին: 1968թ. Արամ Սարոյանի նոր տպագրած գիրքը` շուրջ 30 բանաստեղծություն, NBC-ի լուրերի հաղորդավար Էդվին Նյումանը լուրերի թողարկման ժամանակ կարդաց ամբողջությամբ: Հրատարակել է դատարկ էջերով գիրք և շահել տարվա մրցանակ:

կիրակի

ինչպես
խոտերն են
հնձվում

և նրանց հոտը
տարածվում է
կրկնապատկված

ծառերը

ոչնչացվում են
ջրերի մեջ

Այգու աղմուկները սենյակի աղմուկների միջից

ամեն
օր
երկինք

հիվանդ

օդ

ողբերգություն

մարմինների

Ընկերներս մեկը մյուսի ետևից
կորցնում են ինձ
կամ ես եմ կորցնում իրենց
Այսօր ոչ մեկի հետ չեմ խոսել

քեզ հետ զրուցելիս
առարկաները շրջվում են՝
աթոռ ու պատ
և այո, դու՝
սպիտակ արմունկներով
հայտնված պատահական աշխարհում
բառերի մի-
ջև

Անգլերենից թարգմանեց Հասմիկ Սիմոնյանը

Լուսանկարում՝ Արամ Սարոյան, Լյուսի Սարոյան, Քերոլ Սարոյան, 
1947թ., Սան Ֆրանցիսկո 

Լուսանկարիչ՝ Վիլյամ Սարոյան