Ջեյմս Ջոյս | 1883-1941թթ., Իռլանդիա

17 հետաքրքիր փաստ Ջոյսի կյանքից

1. 1882թ. ծնվել է ոչ միայն Վիրջինիա Վուլֆը, այլ նաև Ջեյմս Ջոյսը: Երկուսն էլ առաջին անգամ հրապարակվել են 1920թ. և թվերի համակեցությունը չխախտելու համար նույն տարում էլ մահացել:

2. Հինգ տարեկանում Ջոյսի վրա էր հարձակվել հարևանի շունը, ու դրանից հետո նա ամբողջ կյանքում վախենում էր շներից:

3. Ջոյսի սարսափներից էին նաև ամպրոպն ու կայծակը: Իսկ վախեցրել էր դայակը՝ ասելով, թե դա Աստծո զայրույթն է՝ ուղղված փոքրիկ տղային: Այդ վախը ևս ուղեկցեց նրան ողջ կյանքում, իսկ «Ֆիննեգանի հոգեհացը» վեպում նա հորինում է 100 տառանոց մի բառ, որով նկարագրում է ամպրոպն այն պահին, երբ Ադամն ու Եվան վռնդվում են դրախտից: Բառն այդ հնչում է չգիտեմ՝ ոնց, բայց գրվում է այսպես՝ Bababadalgharaghtakamminapronnkonnbronntonnepronntuonnthunntrovarr
hounawnskawntoohoohoordeenenthurnuk:

4. Նա հրաշալի երգում էր, ուներ տենորային ձայն, նվագում էր կիթառ ու դաշնամուր:

5. Տանել չէր կարողանում, երբ ջահել գրողները խնդրում էին լսել կամ կարդալ իրենց գրածները: Ուիլյամ Բաթլեր Յեյթսը բացառություն չէր: Նա տենչալով տենչում էր, որ Ջոյսը գոնե մի րոպե տրամադրի իրեն, Ջոյսն էլ ամեն կերպ խուսափում էր հանդիպումից: Մի անգամ փողոցում Յեյթսը բռնացնում է Ջոյսին ու… «Փողոցում քայլող ամեն ապուշ ավելի հետաքրքիր է ինձ, քան քո գրած բանաստեղծությունը», – ասել էր Ջոյսն ու հարցը փակել:

6. Ջոյսն արագությամբ էր լեզուներ սովորում, թեև որոշ լեզուներ ինչ արագությամբ սովորում էր, նույն արագությամբ էլ մոռանում էր: Օրինակ՝ որպեսզի բնագրով կարդար Չեխովին, նա շատ արագ ռուսերեն է սովորում, բայց ավելի ուշ խոստովանում է, որ ռուսերենից միայն բարևն ու հաջողն է հիշում: Այնուամենայնիվ, նա գիտեր մոտ 30 լեզու, այդ թվում՝ հին անգլերեն, ֆրանսերեն, գերմաներեն, հունարեն, իտալերեն, եբրայերեն, ռուսերեն, ճապոներեն, չինարեն, ֆիններեն և այլերեն: