Բիլլի Քոլինզ | ծնվ. 1941թ, ԱՄՆ

Որոշ oրեր

Օրեր կան, երբ մարդկանց նստեցնում եմ սեղանի մոտ ամենքին իր տեղում
ծնկները ծալում եմ
և հնարավորության դեպքում
ոտքերն ամրացնում եմ փայտե նիհարիկ աթոռներին

Մի ամբողջ օր նայում են իրար
տղամարդը` շագանակագույն կոստյումով,
կապույտ շրջազգեստով կինը 
կատարելապես անշարժ և որքան հրաշալի են նրանք իրենց պահում

Բայց ուրիշ օրեր են լինում, երբ ես մեկն եմ,
ով բարձրանում է կողոսկրերի վրա
հետո իջնում տիկնիկատան ճաշասենյակ
և նստում մյուսների հետ երկար սեղանի շուրջ

Ծիծաղելի է անչափ 
բայց դուք ոնց կվերաբերվեիք դրան
եթե պատրաստվեիք անցնել մի օրվանից մյուսը` 
չիմանալով երբեք

ֆռֆռալով ինչպես անհոգ աստված 
քսելով ուսերդ ամպերին
կամ նստած պաստառի տակ
նայելով դեմ դիմացդ քո պստլիկ պլաստմասսայե դեմքով

Անգլերենից թարգմանեց Հասմիկ Սիմոնյանը