Թոնդրակ

Ֆոտոն՝ Աննա Դավթյանի

Թոնդրակ | ծնվ. 1977թ., Հայաստան

 

*

Մետաղադրամ
220 վոլտ զնգոցով…

Մի բաժակ «Նոյ» ու «Ջերմուկ»…

Խմել ու չգիտակցել
որ մի բաժակ ջուրն իսկ բավական է
քաղաքականությանը մասնակցելու համար…

Խմել ու ամբողջանալ
այլոց կանանց հետ

և զավակների տեսքով
ուրիշ հայրերի…

*
Բոլոր բառերի թիկունքում էլ
ինչ-որ մեկը կա,
սակայն քո անունը կօգնի,
որ անցնես հայելուց անդին…

Իսկ ջրերի վրայով
թող մեկ ուրիշը քայլի…


*

Գովազդափոշի հավաքող մեղուներ…

Հագուստներ, որ մարմիններ են
պատվիրում…

Տես, թե Երկինքն ինչպես է
գունաթափվում աչքերիդ մեջ…

 

*
Սրտիս մեջ
մլավող կատվահետքեր են…

Կոկորդիս մեջ
ձկնափշերի պես խրված բաղաձայններ…

Մի կին
սանրվում է աչքերիս մեջ… 

 

*
Մենությունը,
որ բուն է դրել հայելու մեջ,
սարդոստայններ է լույսից հյուսել
ու բառեր է որոնում…

Մի հայացք
քեզ է փնտրում…


*

Ոչինչ չի մնացել ասելու,
որն ինձ պահի ոտքի վրա,
ոչինչ չի մնացել,

բացի
իմ ձայնից,
իմ չարտասանված բառից,
որ թպրտում է
քո շրթունքներին…

«Արձանագրություններ Կաքավաբերդի պարիսպներին» շարքից


4.

Եվ քնելուց առաջ
քո մեջ արթնացող վայրենուն
չմոռանաս օրորել
աղմկող քաղաքի հեքիաթով…

5.

Ամուսնանալ Պանդորայի հետ և լուսանկարվել
ժամանակի ու դրա բացակայության միջև…

 

Կիսվել
  •  
  •  
  •  
  •  
No Comments

Post A Comment