Անրի Գրիգորյան | ծնվ. 1987թ., Վրաստան

Աղջիկների հետ վերջին զրույցներիցս

Ֆրանսուհին.
– Ֆրանսիացիներս Մարիոն Քոտիարին չենք սիրում, որովհետև նա շատ է նման ֆրանսուհու:

Հունգարուհին.
– Սևերին ատում եմ: Հա, ռասիստ եմ:

Չեռնոգորուհին.
– Դու չես կարող ինձ ապացուցել, որ Աստված գոյություն ունի: Դա նույնն է՝ փորձես ապացուցել, որ Սպայդերմենը գոյություն ունի:

Խորվաթուհին.
– Ես կենդանաբան եմ: Սիրում եմ բոլոր կենդանիներին: Սիրում եմ նրանց փայփայել, շոյել և ուտել:

Ֆրանսուհին.
-Ես ինը լեզու գիտեմ:

Սլովակուհին.
– Ես լութերական եմ, պաստոր եմ դառնալու, եկեղեցում քարոզ եմ կարդալու, բայց ամուսնանալ ինձ կթույլատրվի:

Չեռնոգորուհին.
– Դե ապացուցի, որ Սպայդերմենը գոյություն ունի, որովհետև ես պնդում եմ, որ գոյություն ունի:

Հունգարուհին.
-Նախկին բոյֆրենդս սև էր:

Խորվաթուհին.
– Օձերից վախենում եմ ու զզվում, բայց նրանց համարում եմ համակրելի:

Հունգարուհին.
– Քննությունից հերթական անգամ կտրվեցի: Առավոտյան դասագիրքը կառնեմ:

Ֆրանսուհին.
– Միայն համակրանքը բավական է, որ աղջիկը որևէ մեկի հետ սեքս անի:

Չեռնոգորուհին.
– Ամուսինս տգեղ է, բայց գլխավորը բոյով է:

Խորվաթուհին.
– Նախկին բոյֆրենդս օձ էր պահում:

Անգլուհին.
– Կարծեմ բոյֆրենդս ինձ չի սիրում:

Հունգարուհին.
– Ես ուզում եմ պառկել անկողնուս մեջ, ուտել շոկոլադ և ատել հասարակությունը:

Ալբանուհին.
– Իմ երկրում այնքան շատ կրոն կա, որ ամենաճիշտը ոչ մեկին չդավանելն է:

Ֆրանսուհին.
– Ինձ հետաքրքիր չի, թե որ թվին է մեռել Հյուգոն կամ որ թվին է ծնվել: Ինձ հետաքրքիր չի նրա կյանքը: Չէ, Հյուգոն չէր նեղանա, որովհետև չեմ կարծում նա էգոցենտրիկ լիներ:

Չեռնոգորուհին.
– Ես ընկերներիս ծննդյան օրերը ուղղակի չեմ կարողանում հիշել ու երբեք չեմ շնորհավորում: Չէ: Չեն նեղանում: Ինչո՞ւ պիտի նեղանան:

Հունգարուհին.
– Ընկերուհիս չափազանց ամաչկոտ է: Նույնիսկ չգիտեմ, թե ոնց է խոսելու քո հետ, որովհետև տղա ես ու քեզնից կամաչի: Չէ, օրիորդ չի:

Լեհուհին.
– Առանց խմիչքի մարիխուանա երբեք չեմ ծխել: Հըմ, կարելի է փորձել նաև առանց խմիչքի: Հետաքրքիր է՝ ինչու երբեք չեմ մտածել այդ մասին: Բայց կոկայինը առանց խմիչքի հնարավոր չի, չառարկես:

Հունգարուհին.
– Ինձ միշտ հետաքրքրել է, թե ինչ է զգում տղամարդը օրալ սեքս կատարելիս:

Ուկրաինուհին.
– Մինետ երբեք չեմ արել, իմ երկրի ավանդույթները թույլ չեն տալիս:

Ֆրանսուհին.
– Ես նորմալ տղաներին չեմ սիրում:

Չեռնոգորուհին.
– Կարևորը ամուսինս բոյով է ու նորմալ:

Իտալուհին.
– Սուրբ Ծնունդին խաղալիքներ մեզ Հիսուս Քրիստոսն է բերում, որովհետև մենք կաթոլիկներ ենք:

Ալբանուհին.
– Դժբախտաբար ծնողներս ինձ հյուր են եկել: Երբ են գնալու, որ նորից ազատ ծխեմ:

Հունգարուհին.
– Արի տան քաշած պալինկա խմենք ու մեռնենք, հազիվ հաջողվեց հորիցս գողանալ:

Ֆրանսուհին.
– Հետաքրքիր տղա ես, բայց մի քիչ տարօրինակ: Բուդապեշտում կհանդիպենք:

Not The End